ilDiari – 28 febbraio 2015
I 50 agns de Regjon Friûl Vignesie Julie
“Un discors che al ven di lontan e che al pues lâ lontan”
Interviste al President dal Consei Regjonâl dal Friûl Vignesie Julie Franco Iacop
Intal dibatiment di cumò su la specialitât al mancje dispès un riferiment aes regjons storichis che un president de Cort Costituzionâl, Gaetano Silvestri, al meteve tant che fonde de nestre autonomie. Disin miôr, no si va mai plui indaûr dal secont dopo vuere. Mi somee che par lui no je cussì…
Di fat, il viaç che o vin tacât 50 agns indaûr al ven di une vore plui lontan: di Aquilee romane e po dal Patriarcjât di Aquilee, mari di popui e nazions, lât di là dai confins e precursôr de dimension europeane e internazionâl di chestis tieris, cence dismenteâ chel fuart moment di rispueste aes domandis autonomistichis rapresentât dal Parlament dal Friûl.
Vignìn ai ultins cincuante agns
A son stâts agns che a àn viodût il Consei Regjonâl e lis Zontis ladis daûr frontâ problemis vêrs cun impegn, passion, sens di responsabilitât, spirit riformatôr e sens de comunitât intant che si jere ancjemò daûr a vivi lis profondis tragjediis de Seconde vuere mondiâl dilunc dal confin di jevât de Vignesie Julie cun divisions che a sbregavin e che cul timp a son stadis metudis adun in graziis massime dal spirit europeist che al jere daûr a formâsi.
Tai agns 60 il Friûl Vignesie Julie al viveve condizions di fuart malstâ economic e sociâl. Cuâl isal stât il rûl de Regjon par fânus fâ un salt indevant?
E à creât i imprescj che le àn fate deventâ une des regjons plui indevant a nivel nazionâl cul contribût fondamentâl e unitari dal mont economic e imprenditoriâl, des istituzions, di dutis lis parts sociâls, des minorancis etnichis e linguistichis, des comunitâts religjosis, dal grant mont des associazions e dal volontariât.
E il taramot, ce puest aial inte storie de specialitât regjonâl?
Nol sarès stât pussibile gjestî che tragjiche emergjence e, tai agns daspò, chê che o podin pardabon clamâ la epopee de ricostruzion, cence chel spirit unitari e cooperatîf, a nivel locâl e regjonâl e tal rapuart sclet e costrutîf tra Comuns, Regjon, Stât e Comunitât internazionâl. Cuant che chei altris si son fidâts di nô, la fiducie e je simpri stade ricambiade.
In dì di vuê, però, la autonomie e ven metude in discussion. Cualchidun le stime tant che un privileç…
Tant che principi di fonde, la autonomie no si pues negoziâle. Intune cu lis formis e lis condizions particolârs che a costituissin la specialitât, e jude a perseguî i interès nazionâi. Lu pant chel che o vin sperimentât e realizât chenti. Vonde pensâ al sisteme soci sanitari, a chel dai traspuarts e al sisteme des autonomiis locâls: ducj setôr che a son ad in plen sot de responsabilitât politiche e finanziarie de Regjon, cun beneficis direts no dome pal teritori che o aministrin ma ancje pal Stât. Nissun privileç, duncje, pitost aplicazion avanzade dai principi di sussidiarietât e de governance multi nivel che si pant te azion coordenade de Union europeane, dal Stât, de Regjon e des Autonomiis locâls, fondade sui principis di sussidiarietât, proporzionalitât e partenariât.
Ise pardabon a pericul vuê la autonomie?
Purtrop o sin denant masse dispès a une situazion par cui, midiant di une legjislazion ordenarie, par fa front ae grivie crisi economiche e de finance publiche, al è un progressîf calâ de autonomie finanziarie regjonâl che si volte in fuartis leandis ae azion politiche, cence capî che e je propit la autonomie, cuant che e je ben doprade, che e da un fuart jutori a meti a puest la finance publiche par vie che si cjame di pês e responsabilitâts tignint da cont i principis de democrazie rapresentative.
Ce pensial dai procès di riforme che si sta fevelant in dì di vuê?
Il Consei regjonâl al à simpri dit che no si pues fa di mancul di riformâ l’ordenament complessîf. E o vin ancje dit che la regjon Friûl Vignesie Julie e vûl dâ une man al disvilup dal nestri Paîs. O vin precisât simpri però che si puedin doprâ ben la autonomie e la specialitât, che o vin la ambizion di jessi une esempli, cemût che tantis voltis al è sucedût in chescj prins cincuante agns e che o domandìn dome di jessi metûts intes condizions di fâlu.
Cualis puedino jessi in dì di vuê lis resons de specialitât de nestre regjon?
A son chês di simpri, dome che a van atualizadis. Par esempli, e je vere che il confin orientâl nol è plui chel dal secont dopo vuere, ma la nestre e reste une posizion che e jentre ad in plen intes grandis iniziativis strategjiche de Europe: intune vision nazionâl che e tint a puartâ dut viers il centri, o podìn vê un rûl strategjic propit al servizi de nazion.
E la presince des minorancis, ce rûl aie?
Fondamentâl. La capacitât di fâ stâ dongje e integrâ identitâts diferentis – come che o vin fat in cheste regjon – e je un valôr zontât.
A proposit di riformis, tra lis critichis a chê dai ents locâi, e je ancje chê che gjavâ lis provinciis par fâ lis unions di comuns al è un mût par smamî la identitât furlane.
Intant bisugne dî che al è ridutîf – come che al fâs Fontanini – identificâ il Friûl cu la provincie di Udin. E al è ancje sbaliât pensâ che la difese de identitât e vegni fate dome a nivel istituzionâl: o vin tantis realtâts – la Societât filologjiche, par esempli, o la universitât dal Friûl, associazions, gjornâi – che a lavorin pe difese de identitât furlane. Inte riforme dai ents locâi, po, o vin riclamât in forme clare che lis gnovis unions a àn di promovi e svilupâ ancjemò di plui la identitât.
Ce pensial de propueste di meti dentri il Friûl intune macroregjon?
Intant si scugne dî che la idee di fâ des macro regjons – chê dal Friûl e sarès dome une di chestis – e sedi in plene contradizion sul procès di riforme inviât dal Parlament di cumò che si sta movint par gjavâ competencis aes regjons, no par fa deventâ la Italie un stât federâl. Mi somee un dibatit un pôc fûr dal contest: in dut câs, no crôt che al puedi la ben in Italie.
Parcè?
Parcè che la nestre fonde e je regjonaliste. Cu lis regjons, la Costituzion e à volût dâi un ricognossiment ae struture policentriche de nestre comunitât, intant che cu la specialitât che e je stade dade a ciertis, e à volût sotliniâ la lôr particolaritât: no crôt che si podedi tornâ indaûr.
Cualis alore lis liniis di fonde di une riforme de specialitât?
Il principi al è simpri chel de sussidiarietât: daûr di chel, lis decisions, cu lis responsabilitâts peadis, a van cjapadis al nivel plui eficaç e plui dongje ai citadins. Nô o sin pronts a acetâ la sfide. I nestris citadins nus domandin riformis, semplificazion aministrative, trasparence, inovazion, di doprâ ben lis risorsis publichis. Nus domandin no dome di fâ leçs buinis, ma ancje di esercitâ ad in plen lis funzions di indreçament, di control e di valutazion dai efiets des leçs su la societât regjonâl. Par chel che nus tocje, nô o domandìn al Stât di lassânus pandi dutis lis nestris potenzialitâts. Il nestri impegn nol è dome pe comunitât regjonâl, ma ancje par dute la comunitât nazionâl e europeane.
Per approfondire: link
Print 
PDF
